आयुष्याकडे पाहण्याचा प्रत्येकाचा दृष्टिकोन हा वेगळा असतो. काहीजण संघर्षमयी जीवनासमोर हार पत्करतात तर काहीजण याच कष्टप्रद जीवनावर मात करून स्वतःचं जगणं जिद्दीने सकारात्मकरीत्या घडवतात. अशाच एका संघर्षमय जिद्दीची कहाणी ‘पाटील’ या आगामी मराठी चित्रपटातून रुपेरी पडद्यावर साकारली जाणार आहे. स्टार क्राफ्ट मनोरंजन प्रा.लि. सचिकेत प्रोडक्शन्स, शौभम सिनेव्हिजन्स प्रा.लि निर्मित ‘पाटील’ ध्यास स्वप्नांचा या चित्रपटात शिवाजी पाटील यांचा प्रेरणादायी प्रवास मांडला आहे. येत्या २६ ऑक्टोबरला हा चित्रपट प्रेक्षकांच्या भेटीला येणार आहे.

‘व्हॅनिला स्ट्रॅाबेरी अँण्ड चॉकलेट’ म्हटलं की लगेच तोंडाला पाणी सुटतं.. पण जरा थांबा...! कारण ही काही आईस्क्रीमची फ्लेवर्स नाहीत तर हे आहे आगामी मराठी सिनेमाचं नाव..!! होय... ‘व्हॅनिला स्ट्रॅाबेरी अॅण्ड चॉकलेट’ नावाचा एक गोड सिनेमा १६ नोव्हेंबरला तुमच्या भेटीला येतोय. आजवर तुम्ही मराठीत अनेक प्रेमकथा पहिल्या असतील ही पण एक प्रेमकथाच आहे पण दोन व्यक्तींमधील नव्हे तर एका मुलीची तिच्या लाडक्या ‘व्हॅनिला’ सोबतच्या प्रेमाची.

अमृता खानविलकर हे नाव जसं मराठी सिनेसृष्टीत अप्रतिम अभिनय आणि सुंदर नृत्य साठी गाजलं आहे, तसेच आता बॉलीवूड मध्ये सुद्धा अमृता तिच्या अभिनयाची जादू दाखवत आहे. राझी, damaged, सत्यमेव जयते नंतर अमृता दिसणार आहे ‘आणि डॉ. काशीनाथ घाणेकर’ मध्ये.

'भिऊ नकोस, मी तुझ्या पाठीशी आहे..' हे वाक्य नुसते उच्चारले तरी लगेच स्वामी समर्थांचे रुप नजरेसमोर दिसू लागते. मनाला धीर देणारे त्यांचे हे वाक्य जगण्याला नवी उर्जा मिळवून देते. स्वामींच्या दर्शनाने मनातील खंत, नाराजी आणि दुःख सारी कमी होत असल्यामुळे, स्वामींचा अगाध महिमा लवकरच मोठ्या पडद्यावरदेखील आपल्याला पाहता येणार आहे. कारण, स्वामी समर्थांच्या जीवनावर आधारित मराठी सिनेमा दिग्दर्शक समीर रमेश सुर्वे लवकरच घेऊन येत आहे. 'श्री स्वामी समर्थ' असे या सिनेमाचे शिर्षक असून, खास दसऱ्याच्या मुहूर्तावर याची अधिकृत घोषणा करण्यात आली. दादरच्या प्रसिद्ध स्वामी समर्थांच्या मठात दसऱ्याच्या दिवशी पार पडलेल्या या छोटेखानी कार्यक्रमात मराठी सिनेसृष्टीतले स्वामीभक्त कलाकार अंकुश चौधरी, सतीश पुळेकर आणि किशोरी अंबिये यांनी प्रमुख उपस्थिती लावली होती.

पुन्हा बहरणार रंगभूमी... अवतरणार सुवर्णकाळ ... वायाकॉम18 स्टुडीओज प्रेक्षकांच्या भेटीस घेऊन येत आहेत मराठी रंगभूमीचा पहिला सुपरस्टार डॉ. काशिनाथ घाणेकर यांचा विलक्षण प्रवास. वायाकॉम18 स्टुडिओज बायोपिक्सच्या उल्लेखनीय सादरीकरणासाठी प्रसिध्द आहे. मराठी मध्ये पहिल्यांदाच डॉ.काशिनाथ घाणेकर यांच्यावर सिनेमा येत असल्याने या चित्रपटाच्या घोषणेपासूनच प्रेक्षकांची उत्सुकता शिगेला पोहचलेली आहे. चित्रपटाचा विषय, त्यामधील तगडे कलाकार यामुळे चित्रपट बराच चर्चेत राहिला असून हा चित्रपट प्रेक्षकांमध्ये आकर्षणाचे केंद्रबिंदू ठरला आहे. सुबोध भावे या चित्रपटात मुख्य भूमिका साकारत असून चित्रपटाच्या दोन्ही टीझरला प्रेक्षकांचा उदंड प्रतिसाद मिळाला आहे. चित्रपटाच्या टीजरला ४.५ लाखापेक्षा अधिक व्ह्यूज मिळाले आहेत. वायाकॉम18 स्टुडीओजप्रस्तुत या चित्रपटाचा ट्रेलर सुबोध भावे, सोनाली कुलकर्णी, सुमीत राघवन यांच्या उपस्थित नुकताच प्रदर्शित झाला. दिवाळीच्या शुभमुहूर्तावर ८ नोव्हेंबर रोजी “आणि ... डॉ. काशिनाथ घाणेकर” हा सिनेमा रुपेरी पडद्यावर प्रेक्षकांच्या भेटीस येणार आहे.

लेखक, अभिनेता प्रविण विठ्ठल तरडे लिखित आणि दिग्दर्शित ‘मुळशी पॅटर्न’ या आगामी मराठी चित्रपटाच्या टीमने खंडेनवमी आणि दसऱ्यानिमित्त अनोखे शस्त्रपूजन केले. यावेळी शेतकऱ्यांकडून शेतीच्या कामासाठी वापरल्या जाणाऱ्या विविध अवजारांचे पूजन शेतकऱ्यांच्या प्रमुख उपस्थितीत चित्रपटाच्या टीमने केले. अभिजित भोसले जेन्यूइन प्रॉडक्शन्स एलएलपी आणि पुनीत बालन एंटरटेनमेंट प्रा. लि. यांची निर्मिती असलेला बहुचर्चित ‘मुळशी पॅटर्न’ हा चित्रपट शेतकऱ्यांच्या प्रश्नांना वाचा फोडणारा आहे.

Advertisement