'मन मंदिरा' हा किर्तनावर आधारित कार्यक्रम आहे. महाराष्ट्रातील एका उत्तम लोककलेला, एक फार मोठे व्यासपीठ या माध्यमातून मिळाले आहे. विविध कीर्तनकार इथे आपली कला सादर करतात. कीर्तनाच्या माध्यमातून लोकांचे मनोरंजन करणे व योग्य शिकवण देणे हा या कलाकारांचा मूळ उद्देश असतो. 'कीर्तनकार' हा शब्द ऐकल्यावर, एखादी बुजुर्ग, अनुभवी व्यक्ती डोळ्यासमोर येते. पण, या रविवारी, म्हणजेच ७ एप्रिल रोजी, 'मन मंदिरा'च्या नव्या भागात, एका तरुण कीर्तनकाराने केलेले कीर्तन पाहायला मिळेल. या दिवशीच्या कीर्तनातील मुख्य कीर्तनकार ह.भ.प. ज्ञानेश्वर माऊली पठाडे यांचे वय अवघे २२ वर्षे आहे. कमी वयातच कीर्तनाची कला उत्तमप्रकारे हाताळून, त्यांनी नाव मिळवले आहे.

स्टार प्रवाहवरील लोकप्रिय मालिका छत्रीवाली मध्ये पाडव्याचा गोडवा पाहायला मिळणार आहे. सहकुटुंब गुढी उभारत या मालिकेतील कलाकारांनी मराठी नववर्षाचं जल्लोषात स्वागत केलं.

स्टार प्रवाहवरील लोकप्रिय मालिका ‘ललित २०५’ मध्ये पाडव्याचा गोडवा पाहायला मिळणार आहे. सहकुटुंब गुढी उभारत या मालिकेतील कलाकारांनी मराठी नववर्षाचं जल्लोषात स्वागत केलं.

झी टॉकीज या मराठी वाहिनीवर, गेली अनेक वर्षे दर्जेदार मराठी चित्रपटांची रेलचेल असते. नेहमीच वेगवेगळ्या प्रकारचे उत्तम चित्रपट प्रेक्षकांना पाहायला मिळतात. त्यामुळेच आज ही वाहिनी सर्वाधिक लोकप्रिय झाली आहे. प्रेक्षकांची पहिली पसंती असलेल्या या वाहिनीवर, यंदाचा गुढीपाडवा कौटुंबिक चित्रपटांची अनोखी मेजवानी घेऊन येणार आहे. शनिवार ६ एप्रिल रोजी, सकाळी ९ वाजल्यापासून हे चित्रपट पाहता येतील. दे धक्का, आम्ही सातपुते, हुप्पा हुय्या, माझा छकुला, नामदारमुख्यमंत्री गणप्या गावडे, पुन्हा गोंधळ पुन्हा मुजरा या चित्रपटांचा यात समावेश आहे. संपूर्ण कुटुंबाला एकत्र बसून पाहता येतील, असे हे चित्रपट पाहण्यात कुटुंबाचा छान विरंगुळा होणार आहे.

विविध कला, संस्कृती आणि साहित्याचा देदीप्यमान वारसा महाराष्ट्राला लाभला आहे. या कला परंपरेत अग्रणी असलेले साहित्य आणि संगीताच्या प्रांतातील दिग्गज म्हणजेच महाराष्ट्राचे वाल्मिकी ज्येष्ठ गीतकार ग. दि. माडगूळकर, अवघ्या महाराष्ट्राला खळखळून हसविणारे अष्टपैलू लेखक ‘महाराष्ट्र भूषण’ पु. ल. देशपांडे आणि मराठी माणसाच्या हृदयावर आपल्या सुरांनी आपले नाव कोरणारे ‘बाबूजी’ म्हणजेच लाडके संगीतकार सुधीर फडके. या त्रयीने आपल्या प्रतिभेने महाराष्ट्रात आपले युग निर्माण केले आणि कित्येक दशके मराठी मनावर कायम अधिराज्य गाजवले. महाराष्ट्रातील या तिन्ही सारस्वतांना त्यांच्या जन्मशताब्दीनिमित्त मानवंदना देण्यासाठी कलर्स मराठीने “मानाचा मुजरा – अमृतयोग” या कार्यक्रमातून साहित्य, संगीत आणि सुरांची मैफल अनुभवण्याची सुवर्णसंधी रसिकांना दिली आहे. गीत, संगीत, नाट्य आणि नृत्याविष्काराची ही अनोखी मैफल रविवारी ७ एप्रिल रोजी पूर्वार्ध दु. १२ आणि उत्तरार्ध संध्या. ७ वा. फक्त आपल्या कलर्स मराठीवर प्रसारित होणार आहे. या कार्यक्रमाचे सूत्रसंचालन स्पृहा जोशी आणि सुमीत राघवन यांनी केले आहे.

सोनी मराठीवरील 'ह.म. बने तु.म. बने' ही लोकप्रिय मालिका नेहमीच आपल्या खुमासदार विनोदी शैलीत दैनंदिन जीवनातील महत्त्वाच्या प्रश्र्नांबद्दल भाष्य करत असते. मालिकेतील प्रत्येक भाग हा मनोरंजनासोबतच नकळत एक संदेश देऊन जातो. 'ह.म.बने तु.म.बने'च्या या अस्सलपणा मुळेच ती प्रेक्षकांची आवडती मालिका बनली आहे. आता सर्वत्र निवडणूकीची धामधूम असताना अतिशय योग्य वेळ साधून 'ह.म.बने तु.म.बने' प्रेक्षकांना आपल्या मतदानाच्या कर्तव्याची जाणीव करून देणारा भाग प्रसारित करत आहे. एक नागरिक म्हणून आपण मतदार ओळखपत्र काढून घेतले आहे का, आपण ते व्यवस्थित हाताळतो का, आणि महत्त्वाचे म्हणजे आपला मतदानाचा हक्क बजावतो का, अशा प्रश्नांवर विनोदी कोपरखळ्या या भागात 'ह.म.बने तु.म.बने' प्रेक्षकांना देणार आहे.

Advertisement